Tot feba falta

Tot feba falta
en ixa tardada
de chulio.
O sol, as boiras,
as flors de os ibiscos,
a tasca de os chardins.
Tot feba falta:
as remors
que plegaban dende luen,
a tristura,
a sapia de a redota.
Tamién a guambra
de as tapias
e os güellos
catando enta os adrentos.
Tamién ixa figuera
que s’acarraza á o muro
e ixe aziprés
que puya dreito
enta o zielo.
E as picarazas
e as palomas
e o piular d’os paxaricos.
E ixa sensazión
d’o tiempo
que se’n ba
amoniquet
e sin sendito.
Tot feba falta
en ixa tardada
de chulio

Tot feba falta. Francho Nagore Laín

De Os zeños d'a tardada (doze poemas 2002 - 2009). Hermosos textos e ilustraciones. En Rolde.